வரதராசன்_பாக்கள்

#வரதராசன்_பாக்கள்

வரமருள்க தமிழே 

*******************

வானப் பரிதியினை நாடித் - தன்னை

   மாய்க்கும் பறவையினைப் போலே

ஞானச் செறிவுகளைத் தேடி - என்ன

   நானும் வருத்துகிறேன் நாளும்!

காணும் பொருள்களிலே தன்னின் - நற்

   கவினை இறைத்தபடி வாழும்

பூணும் வயிரமொழி யான - தமிழ்

   புல்லித் தழுவுகிறா ளென்னை!

அள்ளி யணைத்தபடி நாளும் - தமிழ்

   ஆற்றல் மிகுத்திடவே செய்வாள் 

வெள்ளி மினுக்குவதைப் போல - நான்

   மின்னி ஒளிர்ந்திடவே செய்வாள்!

காட்டும் மனையவளின் பாசம் - அது

   காசில் அடங்கும்சில நேரம்

நீட்டும் உதவிகளுங் கூடச் - சில

   நேரந் தவறிடவுங் கூடும்.

பிள்ளை தருமமைதி தத்தம் - நிலை

   பிறழும் பொழுதுகளு முண்டாம்

முள்ளின் கொடுக்குகளாய்க் குத்தும் - பண

   முதலைக் கொடுமைகளும் எத்தும்.!

காசை யலைந்தலைந்து தேடி - மனக்

   கருணை யொழிந்தவிதங் கண்டு

வேசை யெனும்பலரின் வேடப் - பொய்

   விரிப்பில் விழுந்ததுவு முண்டு.!

எந்த நிலைவரினும் என்றன் - மன

   இணைப்பில் நிறைந்ததமி ழாளின்

உந்தல் துணையிருக்க வாழ்வின் - துயர்

   ஒன்றும் எனையடைய மாட்டா!

பேசும் புளுகுகளும் நாளும் - எனைப்

   பேர்க்கும் பணக்குறைவும் நோயும்

கூசும் அடிவருடு மின்றி - எனைக்

   கொண்டு செலுத்துமவள் வாழி!

மாற்ற மெதுவரினும் என்றன் - மனம்

   மாறும் நிலைவருதல் வேண்டா 

ஏற்றும் இனியமொழி யாளை - நான்

   என்றும் நினைந்திருக்கச் செய்வாள்!

அஞ்சி யடங்காத வாழ்வை - என்

   அன்னை எனக்கருள வேண்டும்

கொஞ்சு தமிழ்மறந்த போதே -கொடுங்

   கூற்றுக் கிரையாக வேண்டும்!!