காமாட்சியம்மன்_ஒருபா_ஒருபஃது
இத்தனை நாளாகப் பார்க்கவியலா என்னன்னை காமாட்சியை இன்றுதான் கண்டேன். . .
வாடா நிலைதந்த மாங்காட்டுத் தாயைப் பாடாதிருந்தால் நான் பாவலனல்லவே. . .இதோ. .. .
காமாட்சியம்மன்_ஒருபா_ஒருபஃது
இன்றுதா னென்னைநீ ஏறெடுத்துப் பார்ப்பதற்குப்
பொன்னாளும் வாய்த்ததுவோ பூங்கொடியே - மின்னற்
கொடியிடையே ஈசன் குலவிளக்கே மீண்டும்
வடிவழகே வாராதோ வாய்ப்பு?
வாய்திறந்த சொல்லெலாம் மாங்காட்டுத் தாயுன்னைப்
பாய்ந்தே அணைக்குதடி பார்வதியே - தேய்ந்தே
அழியும் நிலையெனினும் அம்மாவுன் சிந்தை
கழியாத நல்லருளைக் காட்டு.
காட்டில்வாழ்ந் தாலும் கருணைமிகக் கொண்டவளே
பாட்டிலுனை வைத்தேன் பரையேநீ - தேட்டமுடைப்
பொன்னளிக்க வேண்டா பொருளளிக்க வேண்டாவே
நின்னினைவை நெஞ்சில் நிறை!
நெஞ்சத் தொருநினைவால் நீமண்ணால் ஈசனைக்
கொஞ்சிக் களித்திட ஆற்றுவெள்ளம் - மிஞ்சி
அழியாது காக்க அணைத்திட ஈசன்
தழுவக் குழைந்தார் தளர்ந்து!
(அதனால் ஈசனுக்குத் "தழுவக் குழைந்த நாதர் "என்ற பெயர் வழங்கலாயிற்று) சான்று. . .காஞ்சிப் புராணம்
தளர்ந்துநான் வீழாமற் றாயேநீ காப்பாய்
இளந்தளிரே என்னுள் இருந்தே - தளிர்விப்பாய்
ஏவா நிலையும் எதிரிலா நன்னிலையும்
சாவா மருந்தாகத் தா!
தாயே காமாட்சி தாவிவரும் பிள்ளையை
ஏய உணர்வித்தே ஏற்றிடுவாய் - நாயேனின்
துன்ப மகன்றிடத் துய்ய நிலைதோன்ற
இன்ப மளிப்பாய் இருந்து.!
இருந்திருந்து நானுன்றன் இல்லத்தில் வந்தேன்
விருந்தானாய் கண்ணுக்கு மேன்மை - வருமாறே
என்றன் குடும்பமே என்றுமுன் தஞ்சமடி
என்றுதான் வந்தேன் இழிந்து!
இழிநிலை போக்கி எழில்நிலை யாக்க
வழிகாட்டு தாயே மகிழ்ந்து - செழிப்போடும்
தாங்கு பெயரோடும் தாழா நிலையோடும்
வீங்குவாழ் விங்கெனக்குத் தா!
தாயாகிக் காக்கும் தயாபரியே உன்னடியில்
சேயாகி நிற்கின்றேன் தேமலரே - பாய்ந்தோடும்
காட்டாறாய் நின்னருளைக் காட்டிடுவாய் எல்லோர்க்கும்
நீட்டுவாய் காக்கும் கரம்!
அம்மா எமையாளும் அங்காளத் தாயவளே
நம்பித்தான் வந்தோம் நலமருள்வாய் - உம்பரராய்
என்றைக்கும் வாழ இனிய அருடருவாய்
நின்றாளே வாழ்வின் நிலை!
No comments:
Post a Comment